Dumanon iti 12 ti bilang dagiti pimmusay bayat a 9 ti mapukpukaw gapu iti bagyo a Crising ken southwest monsoon iti pagilian.
Sigun iti pannakangiwat ti PNP a ni Brig. Gen. Randulf Tuaño, kaaduan kadagiti pimmusay ket gapu iti pannakalmes no sadino, lima kadagitoy ti nairekord sadiay Calabarzon; tallo iti Negros Island Region; saggaysa iti Mimaropa ken Metro Manila.
Dua ti naipadamag a natamaan iti natnag a kayo idiay Northern Mindanao ken iti Bangsamoro Autonomous Region in Muslim Mindanao (BARMM).
Kabayatanna, lima ti mapukpukaw gapu iti flashfloods iti Metro Manila, tallo iti Western Visayas ken maysa iti Calabarzon.
Innayon ni Tuaño a nasurok 6,000 a pulis ti naka “stand-by alert” para iti alisto a panagresponde.
Mainaig iti dayta, inwaragawag ti National Disaster Risk Reduction and Management Council nga agarup 500,000 a pamiliya wenno agarup 2 million nga indibidual iti pagilian ti naapektaran, gapu iti epekto dagiti Tropical storm ken Southwest monsoon.
Dumanon iti 27, 682 a pamilia ti agtaltalinaed kadagiti evacuation centers, bayat nga 11, 881 dagiti adda iti dadduma a natalged a lugar.
Kangrunaan a naapektaran ti Central Luzon, partikular dagiti 288,185 a pamilia, sinaruno dagiti 43,127 a pamilya iti Ilocos Region ken ti Western Visayas Region a 39,263 a pamilia.
Kabayatanna, 418 a lugar iti pagilian ti agtaltalinaed a makapaspasar iti layus.
