BAGUIO CITY – Sumangsango iti kaso a panaglabsing iti RA 9165 wenno Comprehensive Dangerous Drugs Act of 2002 ti 12 a turista, pakairamanan ti 2 a menor de edad iti nagsina nga operasyon nga insayangkat dagiti otoridad ditoy Baguio City ken sadiay Ifugao.
Immuna a nakemmeg ti pito a turista manipud Metro Manila a nakalugan iti parapasahero a bus a paturong sadiay Cubao iti interdiction operation nga insayangkat dagiti otoridad sadiay Viewpoint, Banaue, Ifugao idi malem ti July 21.
Nakumpiskar ti pakabuklan a 15 a kilo ti marijuana manipud kadagiti innem a turista a bin-ig nga estudyante.
Nabigbig dagiti innem a da Titus Jacob Tallada, 20, residente ti Sta. Mesa, Manila; Reneil Dela Cruz Espinosa, 23, residente ti Taguig City, Manila; Daniel Urbano Gavino Tejada, 22, residente ti Taguig City, Manila; Joshua Pagador Dacillo, 19, residente ti San Jose, Del Monte, Bulacan; Reynaldo Tinagan Jerez Jr., 19, residente ti Bagong Silang, Caloocan ken maysa a 17-anyos a residente ti Fairview, Quezon City.
Nabigbig met ti kakomplot dagitoy a ni Jerick Villacorte Crisostomo, 36, pintor, residente ti Tondo, Manila.
Kabayatanna, nakemmeg met ti lima a turista manipud Metro Manila iti buy-bust operation nga insayangkat dagiti otoridad sadiay Slaughter Compound, Santo Nino Barangay, Baguio City idi rabii, July 22.
Nabigbig ti subject ti operasyon a ni Angeline Conching Asistio alyas Tomboy, 20, residente ti Caloocan City.
Nakumpiskar kenkuana ti lima a marijuana bricks nga agdagsen ti lima a kilo.
Narekober metlaeng kenkuana ti naaramat a buy-bust money a bukbuklen ti maysa nga orihinal a 1,000 peso bill ken 34 a pidaso ti 1,000 peso bills a boodle money.
Kinemmeg metlaeng dagiti otoridad dagiti uppat a kakadwa ni Asistio kalpasan a nagpositibo ti panagsukimatda iti backpacks dagitoy a nagresulta iti panakakumpiskar ti uppat a marijuana bricks ken maysa a plastic pack ti marijuana nga agdagsen ti agarup nasurok 4.3 a kilo.
Nabigbig dagiti uppat a da Mike Laurence Aguilar, 23, residente ti Caloocan City; Ceasar Santa Theresa Alanin, 24, residente ti Caloocan City; Jonnel Gumapos Forbes, 22, residente ti Tondo, Manila ken maysa a 16-anyos a residente ti Caloocan City.
