BAGUIO CITY – Makitaripnong kenni Presidente Rodrigo Duterte dagiti opisyal ken dadduma a delegado ti rehion Cordillera inton July 18, aldaw ti Martes.
Panggep ti taripnong a matalantan ti panagbalin nga urgent bill ti House Bill 5343 wenno ti gakat a mangideklara iti Cordillera kas maysa nga autonomous region.
Naamuan a 20 laeng a delagado ti napatgan nga agturong sadiay Malacañang gapu iti security reason ngem ita nga aldaw ket naamuan nga inaprobaranen ni Presidente Duterte ti 120 a bilang dagiti delegado.
Immunan a kinuna ni Presidential Peace Adviser Jesus Dureza a no mapagbalin nga urgent bill ti HB 5343 ket kasapulan latta ti panagkaykaysa dagiti opisyal ken dagiti Cordillerans para iti panaka-aprobar ti gakat.
Dinakamatna pay a manamnama a maysa ti rehiyon Cordillera kadagiti ipaayan iti atensyon ni Presidente Duterte iti maikadua nga State on the Nation Address (SONA) daytoy.
Kabayatanna, supsuportaran met ti National Commission for Culture and the Arts (NCCA) ti kampanya para iti panagbalin nga autonomous ti rehiyon Cordillera.
Impeksa daytoy ni NCCA Executive Director Rico Pableo Jr. iti panagbitlana iti naangay a programa para iti panakarambak ti maika-30 a Founding Anniversary ti Cordillera itay agsapa sadiay Wangal Sports Complex, La Trinidad, Benguet.
Kinunana a nasken nga agkaykaysa dagiti umili ken dagiti opisyal ti rehiyon tapnu magun-od ti tarigagay dagitoy malaksid pay a kasapulan metlaeng ti commitment dagiti opisyal tapnu mapagbalin nga autonomous ti rehiyon.
Kabayatanna, naipaima metten iti probinsya ti Ifugao ti Unity Gong manipud iti probinsia ti Benguet gaputa ti Ifugao ti sumaruno a host province iti panakarambak ti Cordillera Month inton 2018.
