Nagnumar ti agarop 120 nga estudyante iti Baguio Central School iti Feeding Program nga inorganisar ti Baguio Mabikas Kamandag Lady Eagles Club babaen iti panangidaulo ti presidente daytoy a ni Elizabeth Laroya Yu.
Sinuportaran metlaeng daytoy ti Baguio Mabikas Kamandag Eagles Club nga idadauloan ni Rommel Penullar .
Iti panakiuman ti Bombo Radyo kenni Penullar, kinunana a ti nasao a feeding program ket para kadagiti ubbing manipod Grade 1 agingga Grade 3 a karaman iti malnutrisyon a pinili dagiti mannursuro.
Nairugi daytoy a naipatungpal idi 2022 ken maipatpatungpal ita ti binulan.
Malaksid iti pannakaipaay ti taraon, naipapaayan metlaeng dagiti ubbing ti school supplies, food packs, kawes, ken daduma pay.
Kabayatanna, saan a limitado ti Baguio City ti pokus ti nasao nga organisasyon no di ket karaman dagiti dadduma a lugar iti Region Cordillera ken iti ruar daytoy.
Kabayatanna, maysa kadagiti manarimaan a proyektoda ti panakaipasdek ti waiting shed para kadagiti estudyante.//Bombo Noveh Organo