BAGUIO CITY – Nangrugi ita nga aldaw, October 23 ti kabarbaro a curfew hours ditoy siudad ti Baguio.
Sigun kenni Mayor Benjamin Magalong, tengngat rabii agingga alas-kuatro ti parbangon (12AM-4AM) ti kabarbaro a curfew hours ti Baguio manipud iti sigud nga alas-dies ti rabii agingga alas-kuatro ti parbangon (10PM-4AM).
Inlawlawagna a nalukayan ti curfew hours ti siudad tapno matulungan a makarekober dagiti negosyo a naapektaran iti COVID-19 pandemic.
Maipalagip a napalubusanen ti panaglukat dagiti night establishments wenno night bars kas ‘resto bars’ wenno dine-in establishments ditoy siudad.
Sigun met kenni City Permits and Licensing Division head Allan Abayao, naipaka-ammon daytoy kadagiti agarup 120 a bar owners, operators, in-house bands ken masseurs iti siudad iti panakitaripnongda kadagitoy.
