BAGUIO CITY – Simmuko iti istasyon ti pulisya dagiti 13 a suspek a nangtakaw kadagiti desktop computer sets iti maysa a South Korean company sadiay Upper Fairview, Baguio City kanikadua.
Nabigbig ti nagreklamo nga agtagikua iti kompanya a ni Seewon Lee, 24-anyos, tubo ti South Korea, negosyante ken residente iti nasao a lugar.
Nabigbig met nga empleyado ti Soul Company dagiti suspek a bukbuklen ti 10 a lallaki ken 3 a babbae.
Nailanad iti reklamo ti nasao a gangannaet nga inala dagiti suspek ti pito a pidaso ti central processing unit, sangapulo ket uppat a pidaso ti random access memory, pito a video cards, pito a hard disc drives ken pito a desktop computer sets nga aggatad amin iti P179,000.
Sigun met kenni PCI Eddie Bagto, commander ti Baguio City Police Office – Station 1, mismo a dagiti suspek ti simmuko iti istasyon dagitoy kalpasan nga adda dagiti nagtestigo a nakakita iti panangimetda kadagiti nasao a computer units.
Kinunana a dagiti mismo suspek ti nangisubli kadagiti tinakaw dagitoy a banag a temporary a naidulin iti BCPO – Station 1.
Naipasidong iti inquest proccedings dagiti suspek ken naibilin ti panakaibalud dagitoy.
