BAGUIO CITY – Pimmusay ti 13 nga indibidual, pakairamanan dagiti ubbing kalpasan a natnag ti naglugananda nga SUV iti maysa nga irrigation canal sadiay Bulo, Tabuk City, Kalinga idi Abril 18.
Sigun iti Kalinga Provincial Policed Office, pakabuklan a 14 nga indibidual ti nakalugan iti nasao nga SUV nga inmaneho ti maysa a pulis a nabigbig a ni Soy Lope Agtulao, 36-anyos , naasawaan a residente ti Cagubatan, Tadian, Mountain Province ken naidesignar iti Tadian MPS, Mountain Province.
Naamuan a karaman ni Agtulao kadagiti 11 a biktima, pakairamanan ti pito a babbai ken uppat a lallaki, a dead on arrival sadiay Mejia Kim Medical Center ti Brgy. Agbannawag bayat a ti dua a dadduma pay ket pimmusay sadiay Kalinga Provincial Hospital.
Iti inisyal nga imbestigasion dagiti otoridad, uppat kadagiti biktime ket tubo ti Tadian, Mt. Province; siyam ti taga Purok 1, Bulanao, Kalinga no sadino paturong dagitoy iti Bulo Lake idi killaat a natnag ti lugan iti nasao a kanal.
Pinadas pay nga isalbar dagiti adulto a biktima dagiti ubbing a malmalned iti nasao a kanal ngem saanen a naispal pay dagitoy.
Maim-imbestigaran met itan ti panakapasamak ti nasao nga insidente nupay atapen dagiti otoridad nga overloading ti maysa a rason ti aksidente.
