BAGUIO CITY – Addan iti kustodiya ti Tuba Municipal Police Station ti driver ti Abra Traivedy Trans nga addaan iti plaka AYV-445 a natumba sadiay Naguilian Road, Yagyagan, Tuba, Benguet itay agsapa.
Segun kenni PCI Andres Calaowa, hepe ti Tuba PNP, pasalog ti bus iti kalsada idi napukawan daytoy iti preno isut gapuna nga indungpar ti driver ti lugan iti igid ti kalsada agingga a natumba daytoy.
Kinuna met ni Stephen Mateo manipud iti Baguio City Emergency Medical Services a maysa kadagiti first responders iti aksidente, a sangapulo ket tallo a tattao ti nadangran ken sangapulo ket maysa kadagiti ti nagsagrap iti minor injuries.
Nupay kasta, adda iti yellow tag ni Michael Ayangan Paladino, ti konduktor ti bus a tubo ti Tadian, Mt. Province bayat a ni Whanny Adian Geston a taga-La Trinidad, Benguet ket adda iti kritikal a kasasaad.
Saan pay laeng a naipaay dagiti maseknan nga opisina ti nagan dagiti nadangran iti nasao nga insidente.
Iti agdama ket agtultuloy pay laeng ti imbestigasyon ti pulisya iti nasao nga aksidente.
