Nakasaganan a maideploy ti 1,371 a police personnel ti Police Regional Office-Cordillera iti nagduduma a sementerio ken tourist destinations iti rehion Cordillera tapno pagtalinaeden ti linak ken kappia bayat ti panagrambak ti All Soul’s Day ken All Saint’s Day inton Nobiembre 1 ken 2, ita a tawen.
Iti pannakiuman ti Bombo Radyo kenni Police Lieutenant Colonel Roy Augustus Calulot, pannakangiwat ti Philippine National Police-Cordillera, kinunana a malaksid iti nasao a banag, mangibangonda metlaeng ti 197 police assistant desks kadagiti kangrunaan a lugar a kas iti sementerio, bus terminals, malls ken pagpasyaran.
Ti police assistant desks ket agserbi kas information center kadagiti agturong ken bumisita iti nagduduma a lugar iti rehion Cordillera.
Makitinnulong iti Police Regional Office Cordillera dagiti 693 a personnel manipod iti nagduduma nga ahensia ti gobierno a kas ti AFP, BFP, City Disaster Risk Reduction and Management Council, Municipal Disaster Risk Reduction and Management Council iti tunggal siudad ken munisipyu.
Malaksid iti dayta, mainayon pay ti 800 a force multipliers a kas kadagiti tanod, radio groups, ken non-government organizations a tumulong kadakuada tapno maipasigurado a naannayas ken natalged a marambakan ti All Soul’s Day ken All Saint’s Day.
Kabayatanna, nagpalagip ni Calulot kadagiti maipawil a banag a kas kadagiti natatadem nga igam iti kanito a sumrek kadagiti pagturungan a sementerio bayat ti pananglagip kadagiti pimmusay nga ay-ayatenda iti biag.
Impalagipna metlaeng a liklikan ti mangi-post iti social media ti maipapan ti lokasion dagitoy nangruna nu panawanda dagiti pagtaengan dagitoy tapno maliklikan a serken dagiti agtatakaw bayat nga awan dagitoy iti pagtaenganda.
Insingasingna a siguraduen a naka-padlock ti balayda ken nasaysayaat nga ibilin kadagiti mapagtalkan a kaaruba wenno kabagian ti mapanawan a pagtaengan.
