BAGUIO CITY – Nagdidinnungpar ti 14 a lugan sadiay Bokawkan Road, siudad ti Baguio itay agsapa a nangitunda iti panakadangran ti uppat (4) nga indibidual.
Nairaman iti nasao nga insidente ti dua a truck, tallo a parapasahero a jeep, uppat a taxi, maysa a motorsiko, maysa a van, maysa a delivery truck ken dua a pribado a lugan.
Naamuan a dagiti met naiturong iti pagagasan ket ti mismo a driver ti 10-wheeler truck a ni Rodel Dizon, 35 anyos; rider ti motorsiklo a ni Loven Cawed, 25 anyos ken dagiti dua a pasahero ti van a da Lovely de Castro, anyos ken ni Mary Manangan, 22 anyos.
Sigun iti helper ti 10-wheeler truck, naglaon daytoy iti 20 tonelada a darat ken paturongda sadiay Puguis, La Trinidad idi narikna ti driver a naawan ti preno ti lugan a nangitunda tapnu madungparna ti truck a sarsarunen daytoy.
Gapu iti panangdungpar ti 10-wheeler truck iti truck a sarsarnuenna ket nadungpar met ti nasao a truck dagiti dadduma a lugan a sarsarnuen dagitoy.
Nangitunda met iti nailet a taray ti trapiko ti nasao nga aksidente ngem dagus metlaeng a naisima kalpasan a naipaigid dagiti amin a lugan.
Manarimaan pay ti assessment ti Baguio City Police Office iti pakabuklan a gatad dagiti nadadael kadagiti lugan a nairaman iti nasao nga aksidente.
