BAGUIO CITY – Sumangsango iti kaso a panaglabsing iti PD 1602 wenno ti Prescribing Stiffer Penalties on Illegal Gambling ti 14 nga indibidual kalpasan a natiliw dagitoy iti nagsina nga operasyon dagiti otoridad sadiay San Luis ditoy Baguio City ken Camp 1, Tuba, Benguet itay laeng nabiit.
Maibasar iti report, nakemmeg ti siyam kadagitoy kalpasan nga inyuman ti maysa a maseknan nga umili iti pulisya ti operasion ti illegal gambling wenno panagsugalda sadiay Purok 8, Sampaguita Site, San Luis ditoy siudad.
Karaman kadagiti natiliw ti mannursuro, taxi driver, laborers ken construction workers.
Nakumpiskar manipud kadakuada ti naaramat a baraha, 620 pesos cash, uppat a pangpallot a kawitan no sadino tallo ti natay ken daduma pay a kagawaan iti panagsugal dagitoy.
Naiturong dagitoyen pakairamanan dagiti nakumpiskar nga ebindensya iti Naguillan Road Police Station para iti umno a disposisyon ti kaso.
Kabayatana, natilliw ti lima nga indibidual kalpasan a naaktuwan dagiti nagresponde nga otoridad ti panagipatungpalda iti pallot sadiay Sitio Kamuweg, Camp 1, Tuba, Benguet.
Agtawen dagiti nakemmeg iti 25 agingga’t 40 ken bin-ig a mangmangged iti nasao a lugar.
Naala manipud kadakuada ti dua a kawitan ken notebook a nailistaan dagiti pusta dagitoy.
Dagusda a naiturong iti kustudiya iti Tuba Municipal Police Station para iti disposision ti nasao a kaso.
