BAGUIO CITY – Dumanonen iti 144 a business establishments wenno pasdek ti imparikep ti lokal a gobyerno ti Baguio babaen iti City Permits and Licensing Division gapu iti kaawan ti business permit dagitoy manipud Enero agingga Oktobre ti agdama a tawen.
Kinuna ti lokal a gobyerno a pirpirmaan ni Mayor Benjamin Magalong ti closure order dagiti pasdek iti siudad no maduktalan a ti operasyon dagitoy ket awanan ti kaskenan a business permit wenno saan ket naglabsingda kadagiti agdama nga ordinansa ti Baguio.
Dumanon met iti nasurok 2,400 a pasdek ti imparikep ti City Permits and Licensing Division gapu iti kinakurang ti business permit dagitoy.
Gapu iti daytoy, agtultuloy ti panangpalagip ni City Permits and Licensing Division chief Allan Abayao kadagiti negosyante ditoy siudad iti panangpabaroda iti permit-da para iti sumaruno a tawen 2021.
Maipalagip a ti baro nga aplikasyon ken panagpabaro ti business permits ket inton Enero para kadagiti business owners a ti apelyidoda ket mangrugi iti letra nga ‘A’ agingga ‘H’; bayat a Pebrero dagiti letra nga ‘I’ agingga ‘P’ ken Marso dagiti letra nga ‘Q’ agingga ‘Z’.
