MARSEILLE, FRANCE – Pimmusay ti 15-anyos a lalaki kalpasan a nabagbagsol iti lima pulo a daras ken napuoran a sibibiag sadiay Marseille, France itay nabiit.
Maibasar iti imbistigasion dagiti maseknan nga otoridad, tinangdanan ti maysa a 23-anyos a balud ken kameng ti DZ Mafia ti 15-anyos a lalaki tapno butbutngenna ti maysa a grupo ti gang babaen iti panangpuor iti ridaw dagitoy.
Bayat ti panangipatungpal ti 15-anyos a lalaki iti panggepna, nakita daytoy ti maysa a grupo ti gang a karibal daytoy ken natakuatanda nga addaan iti awit a paltog.
Gapu iti daytoy, maulit-ulit a binagsolda sakbayda a pinuoran maibasar iti resulta ti autopsy.
Sigun kenni Nicolas Bessone, prosecutor iti nasao a lugar nga umad-adu ti bilang dagiti ubbing a biktima ken agar-aramid kadagiti krimen iti nasao a lugar.
Maipalagip a ti Marseille, ti maikadua a kadakkelan a siudad iti France ngem maysa daytoy kadagiti napanglaw a siudad nga addaan iti kaaduan a kaso iti drug-related violence.
