BAGUIO CITY – Naituding a maipaima iti Bahay Pag-asa ti 15-anyos bayat a sumango met iti korte ti 18-anyos, agpada a lalaki kalpasan a pinapatayda ti 54-anyos nga skrapper idiay Longlong Road idi kalman, alas kwatro ti parbangon.
Ti suspek ket residente ti Tam-awan ken Pinsao Proper, Baguio City bayat a ti biktima ket residente ti Longlong.
Iti interview ti Bombo Radyo, kinuna ni PMaj. Marcy Marron, Information Officer ti Baguio City Police Office, alas singko ti parbangon idi nakaawatda ti report manipud iti maysa a babai a witness a mangipakpakaammo iti nakadasay a lalaki iti kalsada.
Iti panang-imbestigar dagiti otoridad, kinuna ti witness a pinara dagiti dua a lalaki ti naglugananna a taxi rason a nagsardeng.
Kinuna dagiti lalaki nga itarayda kuma ti biktima iti ospital.
Impakaamo met a dagus daytoy ti witness kadagiti otoridad nu sadino dagus met a nagresponde dagiti kameng ti pulisya ken Emergency Medical Services (EMS).
Iturongda koma ti biktima iti ospital ngem awanen ti vital signs ti biktima ken indeklara dagiti kameng ti emergency medical services a pimmusayen.
Sigun kenni PMaj. Marron, sinukimatda ti CCTV nga asideg iti nakapasamakan ti insidente ket ditoy a naduktalan a dagiti dua a lalaki a nangpara iti taxi ket isu metlaeng dagiti suspek.
Naammoan a matmaturog laeng ti biktima iti kalsada idi napagtripan daytoy dagiti suspek.
Binugbogbog ken dinangdangran dagiti suspek ti biktima a nangitunda iti ipupusayna.
Naduktalan met nga awan ti permanente a pagtaengan ti biktima ngem adaan daytoy iti pamilya.
Iti agdama ket agtaltalinaed iti maysa a puneralya ti bagi ti biktima bayat a maur-uray ti resulta ti otopsiya.
