BAGUIO CITY – Naipalubos ti panaglukat manen ti 15 a balay paginuman manipud iti 44 a balay paginuman ditoy siudad ti Baguio nga imparikep ni Mayor Benjamin Magalong.
Sigun kenkuana, daytoy ket kalpasan a simmunot dagiti 15 a balay paginuman iti permit requirement ken dadduma pay a katulagan a nailanad iti kari dagitoy a naisumitir iti opisinana ken naipablaak iti publiko.
Kinunana ken daytoy ti maikadua ken maudi a gundaway tapnu paneknekan ken sumurot dagiti balay paginuman iti kari a binukelda kas iti umno a panagsurotda iti curfew, panagaramat iti umno a dokumento, panangwanawan kadagiti kostumer ken dadduma pay.
Innayonna nga inkari dagiti balay paginuman ti panangpatalinaedda a nasimpa, disente ken natalged dagiti kostumer dagitoy.
Nupay kasta, inkari met ni Mayor Magalong nga agbalin a nainget ti panangbantay ken panangwanawanda kadagiti naglukat manen a balay paginuman.
Impasiguradona nga asinoman nga aglabsing iti inkari dagitoy ket dagus a maikkatan ti pammalubos nga agnegosyo iti balay paginuman. (-with Bombo Brigitte Marcasi)
