Pimmusay ti sangapulo ket lima nga indibidual bayat a nadangran dagiti sumagmamano a devotees kabayatan ti maibilbilang a kadakkelan a religious gathering iti sangalubungan idiay Prayagraj City, India.
Napasamak ti insidente idi Mierkules, January 29, 2025 bayat ti Hindu religious festival iti Kumbh Mela iti nasao a pagilian.
Sigun iti State Government official a ni Akanksha Rana, napasamak ti insidente kalpasan a nadadael ti alad iti naisayangkatan ti nasao a religious’ gathering.
Gapu iti dayta, nagdidinuron dagiti tattao a nangitunda iti ipupusay ken panakadangran dagiti sumagmamano nga indibidual.
Innayon ti nasao nga opisyal a posible a manayonan pay ti bilang dagiti nadangran ken pimmusay.
Maipalagip a ti world’s largest religious gathering ket marambakan iti agarup tunggal innem ken sangapulo a tawen idiay India.
Patien dagiti Hindus a babaen iti panagdigus iti danum ket maugasan dagiti basol, mangitunda iti pannakaisalakan ket dadduma pay.
