BAGUIO CITY – Nagbalinen a 150 a puon ti masapol a maimula a kasukat ti tunggal maysa a kayo a maputed iti siudad ti Baguio.
Daytoy ket maitunos iti tarigagay dagiti maseknan nga opisyal ti siudad nga ibalanse ti panagdur-as ken ti panangsalwad iti aglawlaw.
Iti interview ti Bombo Radyo kenni Engr. Bonifacio Dela Peña, City Administrator, rumbeng paylaeng a maawagan kas City of Pines ti siudad gapu ta nalawlawa paylaeng ti forest land daytoy nu idilig kadagiti developed area.
Sigun kenni Engr. Dela Peña, adda dagiti intudingda a lugar iti siudad a mabalin a pagmulaan ti pine trees nu sadino maiparit metlaeng ti panangipatakder kadagiti aniaman a klase ti pasdek.
Nupay kasta, inlawlawag ti city administrator a mabalin ti agputed ti kayo kadagiti privately owned lands laketdi mapatgan dagiti agtagikua ti pammalubos (permit) manipod iti Department of Environment and Natural Resources (DENR) ken daduma pay a maseknan nga opisina iti siudad.
Impetteng ni Engr. Dela Peña a masapol metlaeng a mamonitor ti panagbiag wenno surival rate dagiti kayo a maimula nu sadino masapol a masukatan dagitoy apaman a matayda.
Nupay naobserbaran a bumasbassiten dagiti pine trees iti siudad, impasigurado ti opisyal a manageable paylaeng daytoy gapu iti panangirugida kadagiti aksyon a makatulong tapno maliklikan ti urban decay.
Kabayatanna, dinakamatna a saan laeng a dagiti kayo partikular ti pine trees masapol a paayan ti atensyon tapno masalwadan ti aglawlaw nu di ket karaman pay dagiti sewer lines ken panakaimanihar dagiti basura.
Gapu iti dayta, makidkiddaw ti kooperasyon dagiti maseknan a residente ken umili tapno masalwadan ti panakaputed dagiti kaykayo iti siudad.//Bombo Rob Dominguez
