Inispal ti Department of Social Welfare and Development (DSWD) dagiti agarup 160 nga ubbing iti masya nga orphanage sadiay Mexico, Pampanga.
Maatap a nakapasar dagitoy iti pannakamaltrato a pakairamanan ti pannakaigalutda iti napuskol a metal chain, pannakaikandado iti uneg ti banio; panangparintumeng iti graba ken rock salt; pannakasapsaplit babaen ti arnis stick, saanda a naikkan iti taraon a kanen ken dadduma pay.
Sigun kenni DSWD Secretary Rex Gatchalian, impakaammo dagiti ubbing a nakapasarda iti panang-abuso kadagiti house parents, pastor ken director ti Bahay ampunan.
Innayon ni Gatchalian a nangisayangkat dagiti maseknan a social workers iti focused group discussion no sadino, ditoy a napaneknekan dagiti panang-abuso a naaramid kadagiti ubbing.
Ti nasao nga orphanage ket nairehistro ken autorisado ti DSWD a mangaywan kadagiti nabaybay-an nga ubbing.
Nupay kasta, naduktalan ti hepe ti DSWD a napadasan dagiti ubbing iti naduma-duma a klase ti pisikal a pannakaabuso.
Inturong ti DSWD Field Office Central Luzon dagiti ubbing iti sabali a pasilidad ti DSWD sadiay Lubao para iti counseling.
Manarimaan ti proseso ken panangrepaso dagiti social worker kadagiti profile-da, tapno maammuan no ania a center ti mabalin a mangaywan kadakuada.
Kabayatanna, sumangsango iti kaso a panaglabsing iti Special Protection of Children against Abuse, Exploitation, and Discrimination Act ti maysa a pastor nga Americano nga agserserbi kas direktor ti nasao nga orphanage.
