![](https://img.bomboradyo.com/baguio/2020/03/curfew-baguio-covid-2.jpg)
BAGUIO CITY – Pakabuklan a 166 nga indibidual ti kinemmeg dagiti otoridad gapu iti panaglabsing dagitoy kadagiti pagalagadan iti manarimaan nga Enhanced Community Quarantine iti entero a Luzon.
Iti interview ti Bombo Radyo Baguio kenni PMaj. Marlo Evasco, dadaulo ti Baguio City Police Office – Station 7, kaaduan kadagitoy ti naglabsing iti 24-hour curfew ken iti saanda a panagisuot iti face masks kabayatan ti kaaddada iti ruar ti babalayda.
Innayonna a naala ti detalye ti profile ken naballaagan dagiti 166 a natiliw iti saan dagitoy a panag-ulit iti panaglabsingda gaputa mabalindan a makasuan iti second offense.
Dinakamatna pay nga addan ti maysa nga indibidual a kinasuanda iti resistance and disobedience to a person in authority.
Kagiddan iti daytoy, inyunay-unay ni Maj. Evasco ti panagtungpal dagiti umili kadagiti maipatpatungpal a pagalagadan tapnu makaliklik iti COVID-19 kas iti stay-at-home wenon home quarantine policy.
Imbilinna pay ti kanayon a panangitugot iti ID ken iti kaskenan a clearance para iti napateg a gandatda iti sentro ti siudad.