![](https://img.bomboradyo.com/baguio/2020/03/Covid-19-News-Update.jpg)
BAGUIO CITY – Nanayunan iti 17 a baro a kaso ti COVID-19 iti rehion Cordillera iti uneg laeng ti maysa nga aldaw.
Sangapulo ket uppat kadagitoy ti nagtaud sadiay Kalinga bayat a saggaysa iti probinsia ti Benguet ken ditoy siudad ti Baguio.
Nakailista ti probinsiya ti Kalinga iti 14 a baro a kaso ti virus ita nga aldaw kas maibasar iti resulta ti laboratorio nga inruar ti Baguio General Hospital and Medical Center.
Manipud iti nasao a bilang, walo kadagitoy ti nagtaud iti siudad ti Tabuk no sadino pito ti agtaltalinaed iti City Isolation Unit ken maysa iti Kalinga Provincial Hospital bayat a dagiti nabatbati nga ennem a kaso ket nagtaud sadiay Pinukpuk, Kalinga ken amin kadagitoy ti agtaltalinaed iti Municipal Isolation Unit.
Gapo iti daytoy, mangipatpatungpal itan ti Provincial, City ken Municipal Inter-Agency Task Force iti imbestigasion ken contact tracing.
Kabayatana, nailista met ti kanayonan a maysa a kaso ti virus ditoy Baguio City ita nga aldaw babaen iti 26-anyos a babae manipud sadiay Upper Irisan.
Awan ti napasaran ti pasyente a sintomas ti COVID-19 ken awan met daytoy iti travel history.
Nupay kasta, maibasar iti validation, uppat a pasyente ti COVDI-19 ket nabigbig kas “Repatriates” ken mainayon iti National Data
Maibasar iti kaudian a datos ti Department of Health-Cordillera, dumanonen iti 188 ti kaso ti COVID-19 no sadino 63 ti agtaltalinaed iti pagagasan, 123 dagiti naimbagan ken dua ti pimmusay.