Sangapulo ket pito a miembro ken lider iti Abu Sayyaf ti inkeddeng ti Taguig City Regional Trial Court Branch 153 a guilty iti napasamak a kaso iti panagkawtibo iti ganganaet ken Pilipino a turista idiay Sipadan Island,Malaysia idi April 23, 2000.
Iti desisyon nga impaiyulog ti maseknan nga hwes itay laeng kanikadua, sumango dagiti akusado iti 21 counts iti kidnapping and serious illegal detention with ransom nu sadino, nasentensyaan dagitoy iti reclusion perpetua tunggal daras iti kasoda.
Sigun iti Department of Justice, karaman kadagiti convicted dagiti high profile individuals a nakalista metlaeng iti sanctions list iti United Nations Security Council.
Dagitoy ket da Hilarion Del Rosario Santos III alyas Ahmed Santos ken ni Redendo Cain Dellosa.
Ni Santos ti founder ken dadaulo iti Rajah Solaiman Movement, bayat a maysa metlaeng kadagiti lider ni Dellosa.
Agpada ni Santos ken ni Dellosa nga ibilbilang ti United Nations Security Council nga adda ti pakainaiganna iti Al-Qaida,ken Osama bin Laden wenno ti Taliban,kasta met a mangipatpatungpal dagitoy iti aktibidad a mangsupsuporta iti panagrecruit dagiti kameng iti Abu Sayyaf Group,Jemaah Islamiya,ken ti Rajah Solaiman Movement.
Maipalagip nga iti napasamak a panagkawtibo idi 2000, nairaman dagiti sangapulo a western tourists ken onse nga nagtaud iti Asya nu sadino, immuna a nakidnap dagitoy idiay Malaysia sakbay a naiturong idiay Sulu.
