BAGUIO CITY – Dumanonen iti 172 nga stranded Muslim students ditoy Baguio City ti nakaawid sadiay Mindanao iti sidong ti Hatid Estudyante Program ti Department of Transportation-Land Transportation Office (DOTr-LTO) – Cordillera.
Sigun kenni LTO-Cordillera regional director Francis Ray Almora, nakikoordinarda iti nagduduma a kompanya ti bus ditoy siudad tapnu adda ti pagluganan dagiti local stranded individuals nga agawid iti nagtaudan dagitoy a rehiyon kalpasan ti panaka-lockdown-da ditoy Baguio gapu iti COVID-19 pandemic.
Kinunana a karaman kadagiti nagbalin a benipisaryo ti Hatid Estudyante Program ti umuna a batch dagiti 13 nga stranded Muslim students ditoy Baguio nga intulodda sadiay Pasay idi May 29 para iti panagbiahe dagitoy paawid sadiay Zamboanga.
Simmaruno a batch ti 29 nga estudyante ti Al-Maarif Educational Center ditoy Baguio nga intulodda sadiay Manila idi kalman para iti panagbiahe dagitoy paawid sadiay Mindanao.
Maikatlo a batch ti kanayonan a 130 nga estudyante ditoy Baguio a nagbiahe idi kalman paturong sadiay Manila para iti panagawidda sadiay Cagayan de Oro.
Sigun kenni National Commission on Muslim Filipinos Director Abel Macarimpas, kaaduan kadagiti estudyanteda iti Arabic Learning Institute nga agad-adal ti Islamic Theology ti agawid sadiay Mindanao apaman a makapasa dagitoy iti mandatory swab test.
