Nakemmeg ti 18-anyos a number 2 Municipal Top Ten Most Wanted Person iti Police Regional Office 1, La Union Police Provincial Office, Aringay Municipal Police Station iti umuna a quarter ita a tawen iti siudad ti Baguio itay laeng nabiit.
Ti nasao a suspek ket maysa a lalaki, construction worker, awanan iti asawa, tubo sadiay Aringay, La Union, ken residente sadiay Loakan, Liwanag, Baguio City.
Naarestar daytoy dagiti nagduduma a kameng ti otoridad nga indauluan ti Baguio City Police Office-Police Station 8 babaen iti warrant of arrest nga impaulog ti presiding judge ti Branch 31, First judicial region, regional trial court sadiay Agoo, La Union gapu iti panaglabsing daytoy iti Republic Act 11313 wenno ti “Bawal Bastos Law” idi napalabas a tawen.
Narekomendaran met daytoy iti P120-K para iti temporaryo a panakawaya-wayana.
Malaksid iti dayta, adda pay ti sabali a sangsangoen daytoy a kaso gapu met laeng iti panalabsingna iti Safe Spaces Act wenno Gender Based Sexual Harassment idi August 20, 2024 no sadino naipaayan daytoy iti P30-K para iti temporaryo a panakawaya-wayana.
Iti agdama ket adda metten ti nasao a suspek sadiay Bureau of Jail Management and Penology Agoo District Jail.
