BAGUIO CITY – Naisayangkat ti panagbendisyon sadiay Abra Valley Colleges kasaruno ti mapapati a panakasanib kadagiti 18 nga estudyante ti senior high school sadiay idi kalman.
Iti panakiyuman ti Bombo Radyo iti maysa nga staff ti kolehio, kinunana nga agal-ala iti ladawanda ti maysa a grupo dagiti estudyante iti silid pagadalan ti Grade 7 idi killaat nga adda ti nakitada a ‘white lady’ wenno al-alya.
Kinunana a sadiay a nangrugi ti insidente no sadino, adda dagiti agsasangit, agwalwala ken agpukpukkaw ken adda pay dagiti adda ti itudtudoda.
Innayonna a dagiti senior high schools ti kakaruan isut gapuna a naiturong dagitoy iti maysa a simbaan sadiay Bangued.
Maibasar iti video a naala ti maysa a nursing student sadiay, mabuya ti panagsangsangit ken panagwala dagiti ubbing nga arigna nasapian.
Naamuan a 13 kadagiti estudyante ket Grade 7 ken amin dagitoy ket naiturong iti Abra Provincial Hospital ken iti agdama ket agpapapigsa dagitoy.
Sigun iti maysa a mannursuro sadiay, sipud pay idi ket adda dagiti kapada nga insidente ti panagsanib ngem saan a kas ita nga adu dagiti nairaman.
Innayonna a saan a pudno dagiti komento iti video dagiti ubbing a drug addicts dagitoy nangruna ta menor de edad ken kaaduan ket babbae dagiti nairaman iti insidente.
Inyapelada pay ti panangikararag ti publiko kadagiti estudyante ti nasao a pagadalan.
