BAGUIO CITY – Naiturong iti ospital ti 18 a tattao kalpasan a natnag ti jeep a nagluganan dagitoy iti rangkis sadiay Sitio Luding, Poblacion, Tuba, Benguet iti agarup alas 8:30 idi rabii.
Iti pakaiuman ti Bombo Radyo iti Tuba Municipal Police Station, naamoan a ti rangkis a nakatnagan ti lugan ket mapattapatta nga addaan kauneg a siyam a pulo ket walo a metro.
Nabigbig ti driver a ni Ricky Patras, agtawen iti 27, a karaman kadagiti naiturong iti pagagasan bayat a saan pay a nabigbig dagiti pasahero daytoy.
Kinuna ti Tuba Emergency Medical Services a ti dadduma kadagiti pasahero ket nagsagrap iti minor injury bayat a major injuries ti nasagrap ti dadduma.
Iti pannakipatang dagiti otoridad iti driber ket naduktalan a napukawan daytoy iti kontrol iti manebela ti jeep a nangitunda iti nasao nga aksidente.
Iti agdama ket maur-uray ti resulta ti kaudian nga imbestigasion dagiti otoridad para iti pakabigbigan dagiti pasahero a matamtaming iti pagagasan.
