BAGUIO CITY –Nakemmeg ti maysa nga estudyante gapu iti namindua a panangramesna iti maysa a menor de edad a balasitang sadiay Luna, Apayao.
Nabigbig ti suspek a ni Mark Joseph Santos, 19-anyos, awanan asawa, estudyante ti Grade 10 ken residente ti nasao a lugar bayat a ti biktimana ket 16-anyos, estudyante iti Grade 11 ken residente iti nasao a lugar.
Maibasar iti report, nagturong ti biktima iti balay ti suspek kalpasan a binutbuteng daytoy ti suspek.
Impangta ti suspek babaen iti text message nga ipakitana dagiti lamolamo a ladawan ti biktima iti ina daytoy.
Mapapati nga idi adda ti biktima iti balay ti suspek ket inguyod ken inturong ti suspek iti silidna ti biktima ken sadiay a pwersado a rinamesna ti balasitang iti baet ti panagkedked ken panaglaban ti biktima.
Dagus a rimuar iti nasao a balay ti balasitang kalpasan ti insidente ken nagpatulong iti pagayamna ngem sinurot daytoy ti suspek ken idi nakitana nga adda ti kasasao ti balasitang ket inagawna ti cellphone daytoy.
Inguyodna manen ti balasitang pasubli iti balayda ken sadiay a pwersado manen a rinamesna ti biktima.
Apaman a nakaruar ti biktima ket dagus a nagpaarayat iti pagayamna bayat a nakemmeg ti suspek babaen kadagiti nagresponde a pulis.
