BAGUIO CITY – Naipisok iti pagbaludan ti maysa nga ina kalpasan a nakemmeng daytoy iti drug buy bust operation nga impatungpal dagiti kameng ti Baguio City Police Office Station 1 ken Philippine Drug Enforcement Unit sadiay Ferguson Road, Baguio City idi kalman.
Nabigbig ti suspek a ni Norlyn Abdulmadid Demmatang, agtawen iti 19, tubo ti Marawi City ken residente ditoy siudad ti Baguio.
Nakumpiskar iti ikot ti suspek ti tallo a sachet a naglaon iti maatap a shabu nga agdagsen iti agarup 17 a gramo a mapattapatta nga aggatad iti P102,000.
Sigun iti BCPO Station 1, kabayatan ti iligal a transaksion ti suspek ket intugotna pay ti anakna nga agtawen iti tallo.
Kinumpirmar met ni PCI Eddie Bagto, station commander ti BCPO Station 1 a ginandat ti suspek a pasuksukan dagiti pulis ken PDEA agents a nangkemmeng kenkuana.
Nupay kasta, kinuna ti opisial a pinaay dagiti otoridad ti diaya ti suspek a nangitunda tapno maibalud daytoy.
