Pimmusay ti maysa a lalaki, agtawen iti dise nuebe , maysa nga estudiante ken residente iti upper purok 1, Happy Hallow Barangay, Baguio city idi February 18, 2025.
Pimmusay daytoy kalpasan a nabagsol idiay Upper Mabini Street, Barangay Kabayanihan iti siudad ti Baguio.
Nabigbig ti lalaki a suspek nga agtawen iti 20, maysa nga estudiante, awanan iti asawa ken agdama nga agnanaed iti Irishville, San Carlos Heights Subdivision, Barangay Irisan, Baguio city.
Maibasar iti imbestigasyon ti pulisya, rinumwar manipud iti bar ti biktima kadwana ti maysa a waitress.
Dinanug ti biktima ti suspek ken ti maysa kadagiti kadwa daytoy iti saan pay a nabigbig a rason.
Gapu iti dayta, nagibales ti suspek babaen iti panangbugbugna iti biktima usar ti metal Knuckle a mapattapatta nga addaan iti 22 centimeters ti tademna manipud iti handle daytoy.
Maysa a witness ti nangiguyod iti biktima tapno agpaigid, idiay metten a naduktalanna ti agay-ayus a dara manipud iti barukong ti biktima.
Naitaray daytoy iti ospital ngem naideklara metlaeng a pimmusay gapu iti nasagrap daytoy a sugat ken “Hypovolemic Shock”.
Iti agdama, sumangsango ti suspek iti kaso a Homicide.//Via Bombo Noveh Organo
