BAGUIO CITY – Pimmusay ti maysa a welder bayat a nadangran ti kadwana a construction worker kalpasan a nakuryenteda iti pagtatrabahuanda sadiay Km. 4, Asin Road, Baguio City, malem ti May 16, 2021.
Nabigbig ti pimmusay a ni Joshua Gayo Lang-es, 24-anyos, tubo ti La Union bayat a nabigbig ti nadangran a ni Sammy Rafales Cartoneros, 43-anyos, tubo ti Leyte ken agpadada a residente ti Tuding, Itogon, Benguet.
Maibasar iti blotter ti pulisya, manarimaan ti panag-welding dagiti dua idi aksidente a simmagid ti iggemda a landok iti live wire a nangitunda iti panaka-kuryente dagitoy.
Dagus a naitaray dagiti biktima iti Baguio General Hospital and Medical Center ngem naideklara a dead on arrival ni Lang-es bayat nga agpapaimbagen iti pagagasan ni Cartoneros.
