BAGUIO CITY – Nakaruaren iti Baguio General Hospital & Medical Center (BGHMC) ti maysa a pasyente ti COVID-19 idi kalman.
Daytoy ni PH11142, maysa a lalaki, agtawen iti 26 ken daytoy ti maika-26 a COVID-19 survivor ti BGHMC.
Sigun iti nasao a survivor, maysa daytoy kadagiti pammaneknek nga awan ti pilpilien ti COVID-19.
Nalaus ti panagyamanna kadagiti frontliners a timmulong iti panagpaimbagna ken nagyaman pay daytoy iti tulong ti lokal a gobierno ti siudad ti Baguio.
Sigun iti BGHMC, nagnegatibo iti COVID-19 ti dua a swab test a naipatungpal iti nasao a pasiente kalpasan ti 21 nga aldaw a panagtalinaedna iti pagagasan.
Mainaig iti daytoy ket inbalakad ti BGHMC ti panagtalinaed nga alerto ti publiko gapu ta saan pay a nalpas ti laban kontra iti COVID 19.
Iti agdama, agtultuloy ti panagpaimbag ti dua a pasiente ti COVID-19 ditoy siudad ti Baguio sadiay BGHMC.
Maibasar iti Baguio City COVID-19 monitoring, agtaltalinaed a 32 ti kaso ti COVID-19 ditoy siydad, no sadino, 29 ti naimbagan, dua ti aktibo ken maysa ti pimmusay.
Kabayatanna, nanayonan dagiti naimbagan a pasyente ti COVID-19 sadiay Benguet.
Maibasar iti report ti Benguet General Hospital (BeGH), nakaruar iti pagagasan ti maika-pito a COVID-19 survivor ti Benguet idi malem kalman.
Nangipatungpal ti pagagasan iti naragsak a send-off ceremony para iti nasao a pasiente ken indauluan daytoy ni BeGH Chief Of Hospital Dr. Meliarazon Dulay.
Nakipaset iti seremonia ni Benguet Governor Melchor Diclas ken Board Member Nestor Fongwan, Jr.
Sigun iti BeGH, naimbagan metten ti dua pay a COVID-19 patients nga adda iti uneg ti pagagasan ken maur-uray laengen ti desision no kaano a mabalin dagitoy a rumuar.
Iti agdama, maysa laeng ti agpapaimbag a COVID-19 patient ti Benguet ken daytoy ket natamtaming iti maysa nga ospital ditoy siudad ti Baguio ken ita ket addan daytoy iti natalged a kasasaad.
