BAGUIO CITY – Nakemmeg ti dua nga indibidual kalpasan a naaktuwan ti panagaramat dagitoy iti mapapati nga iligal a droga babaen iti pot session sadiay Betag, La Trinidad, Benguet.
Nabigbig dagitoy a da Francisco Guinto, 36-anyos, baro, tubo ti Paniqui, Tarlac ken Mark Cuyco, 29-anyos, vegetable porter nga agpada a residente ti Betag, La Trinidad, Benguet.
Maibasar iti report, nagresponde dagiti nagtitipon a pwersa dagiti nagduduma nga yunit ti pulisya ti Benguet gapu iti manarimaan a maatap a pot session sadiay Betag, La Trinidad.
Naaktuwan dagiti dua ken nakumpiskar kadakuada ti nagduduma a drug paraphernalia a pakairamanan ti maysa nga aluminum foil nga addaan ti maatap a drug residue.
Nakumpiskar pay kadagitoy ti maysa a pakete ti maatap a shabu nga agdagsen ti 0.17 gram.
Kinuna ti pulisya a maibilbilang a newly-identified street level individual dagiti nakkemeg nga indibidual.
Sumangsangon dagitoy iti kaso a panaglabsing iti RA 9165 wenno iti Comprehensive Dangerous Drugs Act of 2002.
