BAGUIO CITY – Nakemmeg ti dua a drug personality ditoy siudad ti Baguio iti nagsina a buy-bust operations nga insayangkat dagiti otoridad.
Immuna a nakemmeg ni Nicole Anne Bermisa Cabarlo, 25-anyos, balasang, awanan trabaho, tubo ti Binmaley, Pangasinan ken residente ti Upper Market, Baguio City.
Nakumpiskar kenkuana ti tallo a pakete ti maatap a shabu nga agdagsen amin iti agarup nasurok 10.5 grams ken ti inaramatna a cellphone iti transaksion malaksid a narekober pay ti naaramat a buy-bust money.
Simmaruno a nakemmeg ni Ryan Tagiba Tictica, 30-anyos, mannalon ken residente ti Lamut, Beckel, La Trinidad, Benguet iti operasyon sadiay Kayang, Hilltop.
Nakumpiskar kenkuana ti tallo a pakete ti maatap a shabu ken narekober ti naaramat a buy-bust money.
Naipila metten ti kaso a panaglabsing iti Comprehensive Dangerous Drug Act of 2002 kontra kadagiti nakemmeg nga indibidual.
Sigun iti Baguio City Police Office, resulta daytoy ti naingetan nga implementasyon ti pulisya ti Baguio iti Simultaneous Anti-Criminality and Law Enforcement Operations iti panakibinnadang ti Philippine Drug Enforcement Agency – Cordillera.
