BAGUIO CITY – Naka-quarantine ita ti dua a jail guards ti Benguet Provincial Jail kalpasan a nagpositiboda iti COVID-19.
Sigun kenni Provincial Jail Warden Peter Tip-ac, malaksid kadagiti nasao a jail guards ket nagpositibo metlang iti COVID-19 ti maysa kadagiti balud sadiay.
Nupay kasta, nakaruaren ti nasao a balud iti quarantine facility kalpasan ti 14-day mandatory quarantine.
Kinuna ni Tip-ac a gapu iti daytoy ket saan pay nga umawat ti Benguet Provincial Jail iti bisita gapu paylang iti pangta ti COVID-19.
Dinakamatna a paset daytoy ti nainget a preventive measures nga ipatpatungpalda tapnu maliklikan nga agwaras ti COVID-19 iti uneg ti provincial jail a mang-apektar iti salun-at dagiti balud sadiay.
Nupay kasta, nakalukat latta ti online visit ken video call sadiay kas alternatibo a panakilangen dagiti balud kadagiti pamilya ken kabagyan dagitoy.
