BAGUIO CITY – Nairaman ti dua a kapitan sadiay Abra kadagiti 89 a kapitan dagiti babbarangay ditoy pagilian a naibilin a masuspindir iti innem a bulan gapu iti anomalya dagitoy iti umuna a panakaiwaras ti tulong pinansial iti sidong ti Social Amelioration Program (SAP).
Nabigbig dagitoy a da Quimloong Punong Barangay Jimmy Cabiao iti Bucay, Abra ken Luzong Punong Barangay Dennis Felina iti Manabo, Abra.
Immunan a kinuna ni DILG Secretary Eduardo Año a maipasidong dagitoy iti innem a bulan a preventive suspension kas maitunos iti pammilin ti Office of the Ombudsman.
Intunda daytoy ti iregularidad ken anomalya nga inaramid dagitoy kabayatan ti panakaiwaras iti umuna a dupag ti SAP a programa ti gobierno.
Naibilin metten kadagiti maseknan a mayor ti dagus a panangsuspendirda kadagiti nasao a kapitan apaman a maawatda ti pammilin manipud iti opisina ti Ombudsman.
