BAGUIO CITY – Im-imbestigaranen ti Regional Epidemiology and Surveillance Unit ti Department of Health (DOH) – Cordillera ti dua a kaso ti B.1.1.529 wenno Omicron variant a nailista ti Baguio City bayat nga agtultuloy ti contact tracing kadagiti amin a posible a nagbalin a close contacts dagiti maseknan a pasyente.
Naamuan a ti maysa a kaso ti Omicron variant ket close contact ti maysa a known COVID-19 case, saan a nakarikna ti sintomas ken awanan ti travel history iti ruar ti Baguio, 14 nga aldaw sakbay ti specimen collection idi December 14, 2021.
Rimwar ti resulta iti kabigatanna a positibo daytoy iti COVID-19.
Naipatulod met ti specimen daytoy iti Philippine Genome Center (PGC) idi December 23, 2021 para iti sequencing.
Nakarikna met ti sintomas ti maikadua a kaso ti Omicron variant nupay awanan met daytoy ti travel history iti ruar ti Baguio City, 14 nga araw sakbayna a narikna ti nasao a sakit.
Nakolektar ti specimen ti nasao a pasyente idiu December 22, 2021 ken rimwar iti resulta idi December 24, 2021 a positibo daytoy iti COVID-19.
Naipatulod ti specimen daytoy sadiay PGC para iti sequencing idi December 28, 2021.
Naggiddan a rimwar ti resulta ti dua idi Sabado, January 15, 2022 ken nailanad a positiboda iti Omicron variant ti COVID-19.
Iti agdama, imbilin manen ti DOH-Cordillera ti ad-adda a panagannad dagiti umili babaen iti panagtungpalda iti amin a health protocols kontra iti COVID-19.
