BAGUIO CITY – Nakemmeg ti dua nga indibidual kalpasan a dinukutanda ti maysa a menor de edad iti deppaar ti Assumption Road, Baguio City idi kanikadua.
Nabigbig dagiti suspek a da Aries Ramos Passion, 36-anyos, karpentero, tubo ti Bauko, Mt. Province ken ni Jaypee Indin Valera, 27-anyos, laborer, tubo ti Luba, Abra, agpada dagitoy a residente ti East Quirino Hill, Baguio City.
Maibasar iti report, imbulsa ti biktima ti cellphone-na iti jacket-na bayat ti pannagnana iti kalsada.
Nupay kasta, naklaat daytoy gaputa idi aramatennan ti nasao a cellphone ket mapukpukawen daytoy.
Nasipotan met dagiti kameng ti Baguio City Police Office – Station 7 ti insidente a nagresulta iti panangkemmegda kadagiti suspek.
Narekober manipud kadagitoy ti cellphone ti biktima. (-with Bombo Brigitte Marcasi)
