Pimmusay ti dua a lallaki idiay Sitio Bontoc, Barangay Aciga, Pinukpuk, Kalinga kalpasan a nalmes dagitoy ita nga aldaw bayat ti picnic dagitoy.
Nabigbig dagiti pimmusay a ni Renz Cherlton Mangulad Tamalayan, 20-anyos, second year college student ti BS Criminology ti University of Cagayan Valley ken umili ti Atulayan Sur, Tuguegarao City, Cagayan, ken Mark Denver Bunagan Pamittan, 18-anyos, first year college student ti University of Cagayan Valley ti Marine Transpo ken umili ti Lanna, Enrile, Cagayan.
Iti interview ti Bombo Radyo kenni Police Lieutenant Rolandon P. Bongallon ti Philippine National Police Pinukpuk, Kalinga, kinunana a dagiti pimmusay kadua dagiti dadduma pay nga indibidual manipod Tuguegarao City, Cagayan ket bimmisita iti Big Stones idiay Barangay Aciga, Pinukpuk.
Bayat ti panaglangoyda, pinadasda ti bumallasiw iti karayan.
Kalpasan a nakadanonda iti bangir a karayan, pinadasda ti aglangoy nga agsubli ngem natiliwanda iti napigsa a panagayus ti danum a rason ti pannakalmesda.
Pinadas pay nga isalakan ti kakaduada a ni Malon Calagui ken Angelo Espinosa dagiti dua a lallaki ngem saanda a nabaelan.
Gapu iti dayta, dagosda a nagsapul ti tulong manipod kadagiti lokal nga umili a nangipatungpal ti panagbirok ket kamaudiananna, nasarakan dagiti bangkay iti baba dagiti dadakkel a bato.
Naiturong dagiti dua a lallaki iti Pinukpuk District Hospital ngem naideklara a pimmusay babaen kenni Dr. Aiza B. Catriz-Mastrier.
Iti agdama,manarimaan ti pannakikoordinar ken panangawag dagiti kameng ti Philippine National Police Pinukpuk, Kalinga kadagiti pamillia ti pimmusay.
