![](https://img.bomboradyo.com/baguio/2021/07/Milisyang-Bayan.jpg)
BAGUIO CITY – Simmuko kadadagiti otoridad ti dua a miembro ti Milisyang Bayan ti komunista a rebelde a grupo sadiay Likowan, Amtuagan, Tubo, Abra idi kanikadua.
Sigun kenni Lieutenant Colonel Sonny Gonzales, Commanding Officer ti 71st Infantry Battalion ti Philippine Army, ti panagsuko da alyas Fred ken alyas Gino ket resulta ti nairtengan nga operasyon ti militar ken ti epektibo nga implementasyon ti Community Support Program ti militar ken gobyerno.
Kinunana nga idi simmuko dagiti dua a Milisyang Bayan ket insuko metlaeng dagitoy ti maysa nga M653 rifle a naglaon ti magazine ken 10 a bala ken maysa nga M1 Garand rifle nga addaan ti maysa a clip ken pito a bala.
Dinakamatna nga agkabsat dagiti dua a kameng ti Maeng Tribe sadiay Abra.
Impeksa met dagiti dua ti panagyamanda gaputa babaen iti panakidayalogoda kadagiti tropa ti gobyerno ket nalawlawagan ti panunotda a biddut dagiti ibagbaga ti rebelde a grupo kadakuada.
Inkari met ni Major General Alfredo Rosario Jr., commanding officer ti 7th Infantry Division, Philippine Army a maipaay ti kaskenan a tulong iti agkabsat ken oportunidad tapnu agbiag dagitoy a natalged manipud iti pangta dagiti rebelde.
Innayonna a nakaro ti pananggundaway ti rebelde a grupo kadagiti nainsigudan nga umili sadiay Abra isut gapuna a pagyamyamananna ti panakalawlawag dagitoy manipud iti panagallilaw ti rebelde a grupo.