BAGUIO CITY – Simmuko iti otoridad ti dua a mannalon a kameng ti Militia ng Bayan ti rebelde a New People’s Army (NPA) sadiday Sallapadan Barrio, Sallapadan, Abra itay laeng nabiit.
Sigun kenni Abra Police Provincial Director, PCol. Christopher Acop, nabaelanda a nakumbinsir ti dua a sumuko babaen iti kanayonda a panagsarungkar kadagiti komunidad ken panagkiddaw iti tulong dagiti umili para iti panagballigi ti End Local Communist Armed Conflict.
Naamuan a dagiti dua ket miembro ti Lumbaya Company ti NPA nga agdakdakiwas iti rehion Cordillera.
Naipasidong metten dagitoy iti proseso ken naiyendorsoda para iti tulong nga ipapaay ti gobyerno kadagiti sumuksuko a rebelde.
Manamnama a babaen iti daytoy ket maipaayan dagiti dua iti oportunidad nga agbiag iti normal.
