BAGUIO CITY – Inruaren ti Baguio City Police Office (BCPO) ti video footage a pakakitaan kadagiti suspek iti pammaltog a napasamak iti junction ti Km. 4, Marcos Highway ken Bengao, Sto. Nino Road, Bakakeng Central, Baguio City idi December 9, 2019 a nakatayan ti negosyante a biktima.
Gapu iti daytoy, nakaruaren manipud iti lock-up cell ti pulisya dagiti dua a lallaki a kinemmeg dagiti otoridad a napagbalin a persons of interest iti krimen.
Nakemmeg dagiti dua gapu iti panangliklikda iti checkpoint nga isaysayangkat dagiti otoridad malaksid a saan dagitoy a nakasuot iti helmet ken awananda iti lisensya.
Naamuan nga iggem ti maysa kadagiti nasao a lallaki ti maysa a helmet a mapapati nga inaramat ti maysa kadagiti suspek.
Inkalintegan ti nasao a lalaki a napidotna laeng ti nasao a helmet iti Suello Village kabayatan ti panagdalyasatda paturong iti pagtrabahuanda.
Napaneknekan met kabayatan ti imbestigasyon nga awan ti pakainaigan dagitoy iti napasamak a krimen.
Immunan a nabigbig ti napapatay a biktima biktima a ni Samuel Lopez Mora, 58-anyos, negosyante, sigud a kameng ti pulisya, tubo ti Zambales ken residente ti Bakakeng Central, Baguio City.
Naamuan pay a napapatay ti negosyante nga anak ti biktima idi November 21 kalpasan a tinambangan ti saan pay a nabigbig nga indibidual sadiay Meycauayan City, Bulacan.
