BAGUIO CITY — Simmuko iti militar ti dua a regular members ti rebelde a New People’s Army (NPA) bayat a naispal ti dua a dadduma pay kalpasan ti namindua a rinnupak iti nagbaetan ti 54th Infantry Batallion, Philippine Army ken ti nasao nga armado a sanga ti Communist Party of the Philippines idi kalman sadiay Tinaptapan, Namal, Asipulo, Ifugao.
Sigun kenni Lt. Col. Narciso Nabulneg Jr., commander ti 54th IB, PA, nangisayangkat dagiti soldado iti combat operations iti nasao a lugar kalpasan a nakaawatda ti impormasyon manipud kadagiti umili seknan kadagiti aktibidad dagiti rebelde sadiay Asipulo, Ifugao.
Kinunana a kalpasan ti nasurok maysa nga oras ken tallopulo a minutos a rinnupak ket immatras dagiti rebelde bayat a nabirukan ken kinumpiskar dagiti soldado ti walo a tolda dagiti rebelde iti nasao a kuta dagitoy.
Narekober sadiay ti nagduduma a de-kalibre nga armas kas iti K3 special automatic weapon ken M16 rifle nga addaan M203 grenade launcher, explosive devices, generator set, cellphones ken sim cards, subversive documents, tallo a bandera ti NPA ken dadduma pay a suplay.
Kinunana a nakarinnupak manen dagiti soldado dagiti agliblibas a rebelde ken sadiay a nakumpiskar manipud kadagiti rebelde ti dua nga M16 rifles bayat a naispal dagiti soldado ti dua a baro a rebelde a nabigbig a da Ka Iyong ken Ka Cindy nga immunan a naipadamag a mapukpukaw, agarup lima a bulan ti napalabas.
Simmuko metlaeng ti dua a regular members ti NPA a da Ka Rambo ken Ka Hadji kalpasan ti nagsaruno a rinnupak ken insukoda ti uppat a de-kalibre nga armas kas iti rifles ken granada, magazines ken 66 a bala.
Mainaig iti daytoy, dinayaw ken pinagyamanan ni Lt. Col. Nabulneg Jr. ti kinapudno ken sinsiridad dagiti sigud a rebelde a nagsubli iti sidong ti gobyerno iti panangipaay dagitoy iti impormasyon seknan iti agtultuloy nga aktibidad dagiti komunista a rebelde iti rehion Cordillera.
Kinunana a dakkel a tulong ti kinatured dagiti nasao nga umili iti panangipatungpal ti pwersa ti gobyerno kadagiti programa para iti linak ken kappia iti pagilian.
Umap-apela pay daytoy kadagiti nabatbati a rebelde para iti panagsuko dagitoy.
