BAGUIO CITY – Maipasidong iti re-evaluation inton sumaruno a lawas dagiti singasing ti SM Prime Holdings Incorporated ken Robinsons Land Holdings para iti development ti Baguio City Public Market.
Sigun kenni Mayor Benjamin Magalong, namnamaenda a babaen iti daytoy ket addan ti mapili a singasing.
Kinunana a ti Technical Evaluation Team a bukbuklen ni City Assistant Planning Officer Antonette Annaban ken ti Mayor’s Office ti mangidaulo iti grupo dagiti evaluators a pakairamanan ti multi-sectoral group.
Linawlawaganna a ti nasao a grupo ket naiduma iti sigud a Public-Private Partnership for the People Selection Committee a nadutukan a mangidaulo iti market redevelopment.
Innayonna a nangisumitir metten dagiti dua a proponents iti kanayonan a requirements a makatulong iti panagdesisyon ti technical team.
Maipalagip nga iti immuna ket pinili ti Public-Private Partnership for the People Selection Committee ti Robinsons a pakaipaayan ti Original Proponent Status ngem pormal nga imbasura daytoy ni Mayor Magalong gapu kadagiti lapses a naaramid kabayatan ti selection process.
