BAGUIO CITY – Nakemmeg ti dua nga agtutubo kalpasan a nakumpiskar kadakuada ti mapapati nga iligal a droga kabayatan ti panagpatrolya dagiti pulis iti deppaar ti Circumferential Road sadiay Km.3, Asin Road, Baguio City idi rabii.
Maysa kadagiti suspek ket 18-anyos, estudyante, baro, residente ti Phase 1, Bakakeng Norte, Baguio City ken ti maysa pay a lalaki a menor de edad.
Maibasar ti blotter ti pulisya, agpatpatrolya dagiti personnel ti Baguio City Police Office – Station 9 iti nasao a lugar idi nakitada nga agin-inum dagiti dua nga agtutubo iti uneg ti maysa a lugan.
Gapu iti daytoy, sinukimat dagiti pulis ti uneg ti lugan ken sadiay a nasarakanda ti maysa a pakete a naglaon ti mapapati a marijuana.
Naala pay iti uneg ti lugan ti dua a bote a nagibusan ti arak, maysa a lighter ken maysa a pakete ti sigarilyo.
Naipasidong metten dagiti dua iti drug test ken naipilan ti kaso a panaglabsing iti RA 9165 kontra kadagitoy.
