BAGUIO CITY – Nasarakan ti dua a bangkay ti dua a lalaki iti masakupan ti siudad ti Baguio idi weekends.
Immuna a nabirukan idi agsapa ti Sabado, August 11 ti bangkay ti saan pay a nabigbig a lalaki iti asideg ti main entrance ti skating rink sadiay Burnham Park.
Nakasuot ti biktima iti nangisit nga slacks, medyas, leather shoes, gray a jacket nga addaan hood ken puraw a t-shirt.
Nabigbig daytoy a ni Jeffrey Jalimao, 29-anyos, baro ken resident ti Camp 7, Monticello, Baguio City.
Maibasar iti report ti pulisya, nabirukan ti caretaker ti skating rink ti nasao a bangkay ken dagus nga inreportna kadagiti otoridad.
Inproseso ti PNP-SOCO iti panangidaulo ni PSSupt. Rodrigo Leal ti crime scene ken sadiay a narekober ti plastic transparent lunch box, canister, nadadael a payong ken relo.
Naiturong ti bangkay iti maysa a punerarya sadiay Naguilian Road ditoy siudad para iti otopsiya tapnu maamuan ti rason iti ipupusay daytoy bayat a nainget nga im-imbestigaran ti pulisya ti napasamak iti biktima.
Kabayatanna, nabirukan met ti maysa a garbage collector ti bangkay ti maysa a lalaki a naikabil iti nangisit a garbage bag idi Dominggo, August 12 iti sangwanan ti maysa a trading store sadiay Lower Magsaysay Avenue.
Nakasuot ti biktima iti brown a t-shirt, nangisit a denim pants ken rubber shoes.
Inproseso ti PNP-SOCO iti panangidaulo da PSSupt. Rodrigo Leal ken PCI Juliet Albon ti crime scene ken sadiay nga inisyal a naduktalan a ti rason iti ipupusay ti biktima ket ti bagsol iti kanawan a kilikili ken iti dua a bagsol iti likod daytoy.
Nasuratan ti bakurong ti bangkay iti “akyat bahay” ken “mando”.
Narekober ti pidaso ti papel iti uneg ti plastics bag a nakaisuratan ti “mando ako, who’s next, your next, hehehe.”
Narekober pay bangkay ti maysa a sling bag, lighter, sumagmamano a barya, wallet a naglaon ti uppat a Malaysian Dollar, maysa nga 2,000 Indonesian Dollar ken maysa a 10 Indian Dollar.
Agingga ita ket saan pay laeng a nabigbig ti nasao a bangkay ken naiturong iti punerarya sadiay Naguillan Road, siudad ti Baguio.
