BAGUIO CITY – Nainget a pinaglibakan ti dua a barangay kagawad ditoy Baguio City ti panakairaman ti naganda iti narco-list nga inruar ti PDEA idi kalman.
Iti eksklusibo a panakipatang ti Bombo Radyo kenni Lower Magsaysay Barangay Kagawad Jomarc Pabunan, kinunana a naklaat daytoy idi naamuanna a karaman ti naganda iti nasao a listaan dagiti maatap a protector ti operasyon ti iligal a droga.
Impettengna nga awan ti koneksionna iti transaksyon ti iligal a droga iti siudad ti Baguio.
Patienna met a nairaman ti naganna iti listaan gapu kadagiti tallo nga indibidual a dinutukanna kas barangay tanod idi 2015 tapnu maipaayan dagitoy iti trabaho.
Nupay kasta, kinunana a saanna nga ammo nga agar-aramat dagiti nasao a tanod iti iligal a droga kalpasan a nakemmeg dagitoy idi 2016 ken saanna a ninamnama a nagsubli manen dagitoy iti iligal nga aktibidad.
Innayonna a naklaat unay daytoy iti panakairaman ti naganna iti drug watch list idi July 2016 isut gapuna a dagus a nagturong iti BCPO-Station 2 tapnu madalusan ti naganna ken nagturong pay daytoy iti PDEA-Cordillera tapnu lawlawaganna ti panakairamanna iti listaan.
Impeksa pay ni Kagawad Pabunan nga ad-adda a nag-amak daytoy gaputa agingga ita ket saan latta a naikkat ti naganna iti listaan iti baet a tinungpalna dagiti maikalkalikagum a proseso.
Gapu iti kaudian a pasamak, nangiparang daytoy iti ‘affidavit of explanation’ iti pulisya ken iti publiko tapnu saan a maapektaran ti kandidatura daytoy iti masungad nga eleksion.
Kabayatanna, impetteng met ni Lopez Jaena Barangay Kagawad Dick Gabutan Bravo a nabayagen nga insardengna ti agaramat iti iligal a droga.
Iti eksklusibo a panakipatang ti Bombo Radyo, inakonna a nagar-aramat daytoy iti iligal a droga sakbay ti panagtugaw ni Presidente Rodrigo Duterte ngem saan daytoy a nagbalin a drug pusher.
Kinunana a manipud narugian ti nainget a kampanya kontra iti iligal a droga ket dagus nga insardengna ti panagaramatna iti iligal a droga ken simmuko daytoy iti pulisya.
Dinakamatna a naipasidong met daytoy iti community-based drug rehabilitation program ken negatibo ti kaudian a drug test daytoy.
Imbingay pay ni Kagawad Bravo a nalaus ita ti panag-amak ti pamilyana iti panakainayon ti naganna iti drug watch list isut gapuna nga ikagkagumaanna makikoordinar kadagiti maseknan nga opisina.
