BAGUIO CITY – Nakaruaren iti pagagasan ti dua a pasyente a nagpositibo iti COVID-19 ditoy Baguio City kalpasan a naimbaganda manipud iti nasao a sakit.
Immuna a nakaruar manipud iti Baguio General Hospital and Medical Center ti 52-anyos ken health care frontliner a ni Joel Junsay bayat a simmaruno a nakaruar manipud iti Saint Louis University Hospital of the Sacred Heart ti 67-anyos a ni Jaysay Bactad.
Maipalagip a ni Junsay ti kaunaan a nagpositibo iti COVID-19 ditoy Baguio a nagpabigbig iti publiko tapnu matulongan dagiti maseknan nga ahensia iti panakaisayangkat ti contract tracing.
Iti isasangona iti publiko kalpasan ti iruruarna iti pagagasan, emosyonal nga imbingayna dagiti nariknana kagiddan ti pananglabanna iti COVID-19 ken ti nalaus a panagyamanna kadagiti amin a nangipaay iti suporta ken kararag para kenkuana, pakairamanan dagiti medical frontliners a nakadwana iti ospital.
Impeksana met ti panagyamanna iti Namarsua iti sabali manen a gundaway nga agbiag kagiddan ti panangikarina iti agtultuloy a panangikararagna met kadagiti manglablaban iti COVID-19 ken kadagiti natured a frontliners nga agtatrabaho tapnu agimbag dagitoy.
Kabayatanna, emosyonal met ni Jaysay Bactad kalpasan a sinarabo daytoy ti asawana a ni Enrique Bactad iti iruruarna iti pagagasan.
Maipalagip a karaman ti agasawa kadagiti nagpabigbig iti publiko kas COVID-positive patient tapnu makatulong iti napartak a contact tracing kadagiti nakapulapolda.
Immunan a nakaruar iti sabali nga ospital ni Enrique Bactad idi napalabas a lawas.
Indaluan ni Baguio Mayor Benjamin Magalong ti panakasarabo da Bactad ken Junsay iti iruruar dagitoy, kadwana dagiti medical personnel ken dagiti frontliners dagiti nasao a pagagasan.
