BAGUIO CITY – Im-imbestigaran ita dagiti otoridad ti maysa nga ina a maatap a nangregreg iti sikogna ditoy siudad ti Baguio no sadino, ti nasao a maladaga ti kaubingan a pimmusay ditoy Cordillera a positibo iti COVID-19.
Maibasar iti blotter ti pulisya, ti nasao nga ina ket agtawen ti 23, call center agent ken residente ti Poliwes Barangay, ditoy siudad ti Baguio.
Nailanad met iti salaysay ti attending physician a naitaray iti Emergency Room ti Baguio General Hospital and Medical Center (BGHMC) ti nasao nga ina a kinuyog ti live-in partner daytoy kalpasan a nakapasar iti panagsakit ti tiyan.
Kinuna ti doktor nga impagarupna a manarimaan ti panaglabor ti nasao nga ina.
Nupay kasta, kabayatan ti panangisayangkat ti doktor iti internal examination iti ina ket sadiay a naduktalan ti tallo a tableta nga agas iti uneg ti pribado a paset ti bagi ti ina.
Gapu iti daytoy, inulit ti doktor a nangisayangkat ti internal examination daytoy ken sadiay a nakita ken narekoberna ti kanayonan a tallo pay a tableta.
Sigun iti nasao a doktor, dagiti narekoberna a tableta ket misoprostol.
Maibasar iti impormasyon, ti misoprostol ket maar-aramat tapnu marugian ti panag-labor ti maysa a masikog, mangitunda iti panagregreg ti sikog ken pang-agas iti panagpadara ti nagpasngay nga ina.
Dinamag ti doktor ti nasao nga ina ken sadiay nga inaklonda a ginatangda dagiti tableta babaen iti online iti gatad a P5,700.
Impetteng ti nasao a doktor nga inaramidda amin ti kabaelanda tapnu saan nga agpasngay ti ina gaputa premature paylaeng ti maladaga nga adda laeng iti 27 a lawas wenno nasurok innem a bulan.
Nupay kasta, napilitan a pinagpasngay ti doktor ti nasao nga ina tapnu maispal ti maladaga gaputa nag-epekton dagiti agas nga inaramat daytoy.
Kalpasan a nagpasngay ti ina ket na-confine-da nga agina iti intensive care unit ngem pimmusay latta ti maladaga, dua nga aldaw kalpasan ti panakaipasngay daytoy.
Malaksid iti daytoy, naalaan iti swab test ti maladaga ken iti resulta idi kalman ket positibo daytoy iti COVID-19.
Agtaltalinaed paylaeng ti nasao nga ina iti BGHMC gaputa maur-uray pay ti resulta ti swab test daytoy.
