BAGUIO CITY – Nakemmeg ti dua nga estudyante kalpasan a naaksidente ti motorsikloda kabayatan ti panaglibasda kadagiti pulis a mangkamkamat kadakuada sadiay Pakak, Agbannawag, Tabuk City Kalinga idi kanikadua.
Nabigbig dagitoy a da James Larden Hidalgo, 19-anyos ken ti kadwana a menor de edad nga agpada a taga-Caggay, Tuguegarao City.
Sigun iti pulisya, sinitar dagiti personnel ti Tabuk City Police Station ken 1503rd Maneuver Company, Regional Mobile Force Battalion 15 dagiti dua a nakalugan iti motorsiklo kalpasan a nakaawatda iti impormasyon seknan iti panangibiahe dagiti dua iti iligal a droga.
Nupay kasta, ginandat dagiti dua nga itarayan dagiti pulis ngem kinamat dagitoy dagiti pulis.
Kabayatan ti panaglibas dagiti dua, napukaw ti driver ti kontrol iti motorsiklo ken natumba dagitoy a nagresulta tapnu makamatan dagitoy dagiti pulis.
Apaman a nakaasideg dagiti pulis, nakitada ti half brick ti maatap a dried marijuana a nabalkot iti transparent cellophane ken maysa a plastic bag a naglaon iti kapada a kontrabando.
Naipasidong metten iti kaseknan a proseso dagiti dua bayat a naipaima ti menor de edad iti DSWD.
