BAGUIO CITY–Nakemmeg ti dua nga maibilbilang nga High Value Individual iti munisipyo ti La Trinidad kabayatan ti operasion dagiti otoridad sadiay Betag, La Trinidad, Benguet idi kalman.
Nabigbig dagitoy a da Alvin Ingosan Dapiawen, 27-anyos tubo ti Bauko Mt. Province ken residente ti Betag La Trinidad kenni Icon Rad Ocasen alyas Francine 18-anyos ken residente ti Lubas La Trinidad, Benguet.
Maibasar iti report, nabaelan dagiti otoridad a nagpamarang kas buyer a makagatang iti dua nga pakete ti maatap a shabu nga agdagsen iti 0.30 grams ken mapatta-patta nga aggatad iti nasurok P2,000 manipod kenni Dapiawen.
Nakumpiskar pay manipod kenni Dapiawen ti maysa a pakete ti maatap a shabu nga agdagsen iti 0.08 grams ken mapatta-patta nga aggatad iti nasurok P500.
Malaksid pay iti dayta, nakumpiskar metlaeng manipod kadagiti suspek ti buybust money ken ti cellphone a naaramat kabayatan ti transaksyon.
Sumangsango dagitoyen iti kaso a panaglabsing iti R. A. 9165 wenno ti Comprehensive Dangerous Drugs Act of 2002.
