BAGUIO CITY–Nakasaganan ti dua nga Igorot mix martial arts fighters a lumaban iti Brave 12: KHK Legacy a maangay sadiay Jakarta, Indonesia inton Biyernes.
Gandaten ni Jomar Pa-ac manipud Team Lakay nga ilista ti maikatlo a panangabakna iti Brave Combat Federation iti panagsangoad kenni Hussain Ayyad manipud Bahrain iti flyweight division.
Nag-debut ni Pa-ac iti nasao nga MMA promotion idi December 2016 ken nakailista daytoy iti nagsaruno a panangabak kontra kada Haider Farman ken Atif Mohammad.
Kabayatanna, puntirya met ni Jeremy Pacatiw manipud metlaeng iti Team Lakay nga isubli ti winning streak daytoy iti panagsangoda kenni Kaan Ofli ti Australia iti catchweight division.
Maipalagip a naabak ni Pacatiw iti kaudian a labanna kontra kenni Jalal Al Daja nga inabak met ti stable mate daytoy a ni Crisanto Pitpitunge.
Immu nan a nailista ni Pacatiw ti back to back wins iti Brave kontra kada Chaitanya Gavali ken Thiago Dela Coleta.